សម្តេចតេជោ ហ៊ុន សែន សម្រេចផ្តល់ការចាក់ថ្នាំវ៉ាក់សាំងកូវីត១៩ ជូនមន្ត្រីអង្គភាពស៉ីម៉ាក់ ក្នុងកញ្ចប់អាទិភាព

 

(ភ្នំពេញ)៖ លោក ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយកមជ្ឈមណ្ឌលជាតិកម្ចាត់មីនកម្ពុជា (CMAC) បានថ្លែងប្រាប់បណ្តាញព័ត៌មាន  នៅព្រឹកថ្ងៃទី១១ ខែកុម្ភៈ ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្តល់ការចាក់ថ្នាំវ៉ាក់សាំងកូវីត១៩ ជូនមន្ត្រីអង្គភាពស៉ីម៉ាក់ ក្នុងកញ្ចប់អាទិភាព ខណៈយុទ្ធនាការចាក់វ៉ាក់សាំងការពារជំងឺកូវិដ១៩ បានចាប់ផ្តើមចាប់ពីថ្ងៃទី១០ ខែកុម្ភៈតទៅ។

លោក ហេង រតនា បានបញ្ជាក់យ៉ាងដូច្នេះថា «តាងនាមមន្ត្រី និងថ្នាក់ដឹកនាំអង្គភាពស៉ីម៉ាក់គ្រប់ៗរូប សូមគោរពថ្លែងអំណរគុណយ៉ាងជ្រាលជ្រៅបំផុត ជូនចំពោះសម្តេចអគ្គមហាសេនាបតីតេជោ ប្រមុខរាជរដ្ឋាភិបាល ដែលបានសំរេចផ្តល់ការចាក់ថ្នាំវ៉ាក់សាំងកូវីត១៩ ជូនមន្ត្រីអង្គភាពស៉ីម៉ាក់ ក្នុងកញ្ចប់អាទិភាពនេះ ប្រយោជន៍ដើម្បីការពារសុខភាពប្រឆាំងមេរោគកូវីត១៩»។

ក្រសួងសុខាភិបាល នៅថ្ងៃទី១០ ខែកុម្ភៈ ឆ្នាំ២០២១ បានចេញសេចក្តីប្រកាសអំពី កម្មវិធីចាក់វ៉ាក់សាំងបង្ការជំងឺកូវីដ១៩ ជាបន្តទៀត នៅថ្ងៃទី១១ ខែកុម្ភៈ ឆ្នាំ២០២១នេះ និងថ្ងៃបន្តបន្ទាប់ខាងមុខ ដោយឈរលើគោលការណ៍ស្ម័គ្រចិត្ត។

ទីតាំងសម្រាប់ចាក់វ៉ាក់សាំងមាន៤ទីតាំង ១៖ មន្ទីរពេទ្យកាល់ម៉ែត, ២៖ មន្ទីរពេទ្យព្រះអង្គឌួង, ៣៖ មន្ទីរពេទ្យមិត្តភាពខ្មែរ-សូវៀត និង៤៖ មន្ទីរពេទ្យកុមារជាតិ៕

Posted in: ព័ត៌មានជាតិ